Happdrætti Háskóla Íslands

Gætir unnið, tapar aldrei

Um verkefnið

Aðalbygging Háskóla Íslands fagnaði 85 ára afmæli á þjóðhátíðardegi Íslendinga þann 17. júní 2025. Hún var fyrsta háskólabyggingin sem reis fyrir happdrættisfé og síðan þá hefur Happdrætti Háskóla Íslands fjármagnað á yfir þriðja tug háskólabygginga.

Happdrættinu til heiðurs var herferðinni „Gætir unnið, tapar aldrei,“ hleypt af stokkunum þar sem landsmenn voru minntir á mikilvægi happdrættisins fyrir uppbyggingu Háskólans í hartnær heila öld.

Úr varð sjónræn frásögn, sjónvarpsauglýsing og loks lifandi viðburður sem byggðu í grunninn á sömu spurningunni: Hvernig hefði Háskóli Íslands orðið án happdrættisins?

Markmið

Markmið herferðarinnar var að minna landsmenn á hinn raunverulega samfélagslega ávinning með þátttöku í Happdrætti Háskólans og sýna að stuðningur við happdrættið er í grunninn fjárfesting í framtíð íslenskrar háskólamenntunar. Aðalbyggingin var í aðalhlutverki og vildum við koma því til skila að með hverjum miðakaupum tapar enginn því öll stuðla þau að uppbyggingu Háskólans.

Hönnun

Aðalbygging Háskóla Íslands var látin hverfa í umhverfismiðlum til að sýna svart á hvítu að án stuðnings frá happdrættinu hefði hún aldrei risið.

Einnig var framleidd sjónvarpsauglýsing þar sem sett var á svið skólastofa undir berum himni sem táknræn áminning þess að án stuðnings happdrættisins hefði kennsla Háskóla Íslands þess vegna getað farið fram úti á miðju túni í lemjandi rigningu.

Til að færa hugmyndina yfir í raunveruleikann var sett á svið önnur skólastofa undir berum himni í miðbæ Reykjavíkur þar sem gestum var boðið til kennslustundar með Stefáni Pálssyni sagnfræðingi. Þar settist enginn annar en Ólafur Ragnar Grímsson aftur á skólabekk. Viðburðurinn vakti mikla athygli, bæði í fjölmiðlum og meðal gesta.

Niðurstaða

Herferðin fangaði sterka og samfellda sögu Happdrættis Háskóla Íslands. Jafnframt tókst að endurvekja skilning almennings á því hversu stóru hlutverki happdrættið hefur gegnt í uppbyggingu háskólasamfélagsins alveg síðan Aðalbyggingin reis fyrir 85 árum síðan.

Tryggjum uppbyggingu háskólans

Í upphafi herferðarinnar sást hvergi í Aðalbygginguna á umhverfisskiltum.

Reis fyrir happdrættisfé

Á vefmiðlum reis Aðalbyggingin síðan upp úr jörðinni þar sem hún stendur enn með stolti.

Sjónvarpsauglýsing

Sjónvarpsauglýsingin var frumsýnd á sjálfan þjóðhátíðardaginn þar sem sett var á svið skólastofa undir berum himni sem fangaði sterka mynd um stöðu Háskólans án happdrættisins.

Viðburður á afmælishátíð Háskóla Íslands

Boðið var til hátíðlegrar kennslustundar með Stefáni Pálssyni þar sem búið var að stilla upp annarri skólastofu í miðbæ Reykjavíkur. Viðburðurinn var hluti af afmælishátíð Háskóla Íslands og vakti mikla athygli, bæði í fjölmiðlum og meðal gesta.